ندمانه
ندمانه ليه وبعد ايه
ما خلاص ما عادش ينفع
وكل اللي كان ما بنا زمان
حاجات ما عادتش تشفع
وبعد ما كانت قصه حبنا
بتخلي الاصم يسمع
دلوقتي دابت زي الحبال
مابتدوب كلها وتتقطع
بقيتي زيك زي غيرك خلاص
فراقك ما عادش يوجع
وصدقيني لما اقول
اني انا تاني مش هارجع
هو انا مجنون.. دا انا ما حلتيش غيره قلب واحد
علي ايه كل شويه فيه اوجع
روحي استمتعي بحياتك
وسيبيني انا كمان استمتع
.........................
لاني مش هاضيع عمري
في حاجه طلعت اوهام
وكل وعودك لي وحلفانك
كانت مجرد كلام
انا اتكويت بالنار بعدك
وما لقتش منك اي اهتمام
.....اسمعيني كدا كويس....
لو انتي اخر واحده في الدنيا
وباقي النساء عليي حرام
ولو غلغلوني بالسلاسل
وحطوا علي كتافي الاهرام
لا انتي لي ولا انا ليكي
وخلاص مات الكلام
مات من اخر لحظه
كنت فيها بترجاكي
(ارجوكي ما تسيبينيش
انا بعدك بشوف هلاكي)
ساعتها... ما حستش ان قلبك حن
ولا حتي سمعت نحيب بكاكي
بس خلاص بقيتي زي الاول
لا تعرفيني ولا انا عارفك
ولو في مره قابلتك صدفه
هاعمل نفسي مش شايفك
..........